Türkmenistanyň Inžener-tehniki we ulag kommunikasiýalary institutynda ýokary okuw mekdepleriň talyplarynyň arasynda “Arkadag Serdarly bagtyýar ýaşlar” ýylynda Halkara Bitaraplygymyzyň şanly baýramy hem-de Gündogaryň beýik akyldary, nusgawy şahyr Magtymguly Pyragynyň doglan gününiň 300 ýyllygy mynasybetli “Magtymguly Pyragynyň döredijiligi ýaşlaryň şekillendiriş sungatynda” atly Magtymguly Pyragynyň şygyrlarynyň many-mazmunyny suratlaryň üsti bilen beýan etmek boýunça iň gowy şekillendiriş işleriniň döredijilik bäsleşigi geçirildi.
Ýurdumyzyň birnäçe ýokary okuw mekdepleriniň professor-mugallymlarynyň hem-de talyp ýaşlarynyň gatnaşmaklarynda geçirilen şekillendiriş işleriň döredijilik bäsleşiginde Berkarar döwletiň täze eýýamynyň Galkynyşy döwründe Magtymguly Pyragynyň dünýä edebiýatynyň ruhy täjine öwrülen edebi mirasynyň, şygryýetiniň belentden dabaralanýandygy hem-de halkymyzyň dünýä şan beren şöhratly taryhynda yz goýan beýik akyldarymyzyň düýnümiz, şu günümiz hem-de geljegimiz hakyndaky parasatly pikirleri ündeýän şygyrlarynyň mazmuny talyplaryň surat eserlerinde beýan edildi.
Beýik akyldar Magtymguly Pyragynyň agzybirlik, berkararlyk baradaky pikirleri biziň bagtyýar döwrümizde aňryýany bilen amala aşdy. Halkymyzyň Milli Lideri Gahryman Arkadagymyz hem-de Arkadagly Prezidentimiz il ykbalyny öz ykbalyndan eý gören dana atamyz Magtymguly Pyragynyň umytlara we arzuwlara ýugrulan “Berkarar döwlet istärin” diýen arzuwlaryny hasyl edýär. Berkararlygyň özeninde bagtyýarlyk, abadanlyk, asudalyk we jebislik bar. Dana Pyragynyň setirlerine siňen arzuw hyýaly nesilleriň gursagynda ýaşap, ömürlerden-ömürlere ýol ýasaýar. Ol sözler, ol setirler bu gün Jeýhun bilen Gojaman Hazaryň arasynda ýaýylyp ýatan ümmülmez giňişlikde bagtyýar, asuda durmuşymyza ýaň salýar.
Döredijilik bäsleşigi Türkmenistanyň Bilim ministrliginiň ýörite meýilnamasy esasynda gurnalyp, onuň maksady dana şahyryň watançylyk, ahlak, mertlik, edermenlik, paýhaslylyk, dünýä akyl ýetirmek, eli açyklyk, ynsanperwerlik ýaly häsiýetlerini ýaşlarda terbiýelemek, surat çekmek bilen meşgul bolýan ýaşlaryň döredijilik başarnyklaryny artdyrmak, çekýän suratlarynyň hilini ýokarlandyrmak we özbaşdak işlemek endiklerini ösdürmek hem-de iň oňat ýerine ýetirilen sungat eserlerini döwlet derejesinde geçirilýän sergilere hödürlemek ýaly wezipeleri öz içine alýar.
Bäsleşikde talyp ýaşlaryň Magtymguly Pyragynyň goşgulary boýunça ýerine ýetiren surat eserleri öz täsirliligi bilen tapawutlanyp, emin agzalary tarapyndan oňyn bahalandyryldy.
Arkadagly Gahryman Serdarymyzyň baştutanlygynda Garaşsyz Watanymyzyň dünýädäki abraýyny, mertebesini, şan-şöhratyny has-da beýgeltjek bagtyýar ýaşlarymyzyň ylymly-bilimli, döredijilikli we ruhy taýdan sagdyn adamlar bolup ýetişmekleri ugrundaky amala aşyrylýan beýik işleriň beýany bäsleşige gatnaşyjylarda uly buýsanç döretdi.
Gündogaryň beýik akyldary, nusgawy şahyr Magtymguly Pyragynyň doglan gününiň 300 ýyllygy mynasybetli Magtymguly Pyragynyň döredijiligi ýaşlaryň şekillendiriş sungatynda” atly döredijilik bäsleşigi Arkadagly Prezidentimiziň durmuşa geçirýän parasatly syýasatynyň halkymyzyň bagtyýar ýaşamagy hakyndaky aladasynyň many-mazmuny bilen utgaşyp, şeýle döwletli tutumlaryň başynda duran halkymyzyň Milli Lideri Gahryman Arkadagymyzyň hem-de Arkadagly Gahryman Serdarymyzyň janlarynyň sag, ömürleriniň uzak, işleriniň rowaç bolmagy arzuw edildi.
Gülşirin Agaýewa, “Çyzuwly geometriýa we inženerçilik grafikasy” kafedrasynyň mugallymy.