Guramaçylykly geçen halkara ylmy amaly maslahaty
1913 Hormatly Prezidentimiziň “Watan diňe halky bilen Watandyr! Döwlet diňe halky bilen döwletdir!” diýen parasatly sözleri bu günki gün jebisligiň, bitewüligiň, durnukly ösüşiň, halk hakyndaky aladanyň şygary bolup ýaňlanýar.Türkmenistanyň ykdysady strategiýasynyň esasy ugurlarynyň biri bolan ulag-logistika ulgamy soňky ýyllarada güýçli depginde ösdürilýar. Ol ýurduň çägindäki ýolagçy we ýük gatnawlaryny ýeňilleşdirmekden başlap, halkara üstaşyr gatnawlaryny giňeltmäge çenli giň gerimli taslamalary öz içine alýar. Türkmenistanyň diňe sebitde däl, eýsam yklym derejesinde logistika zynjyrynyň möhüm halkalarynyň birine öwrülýar. Munuň bilen baglylykda, ulag ulgamynyň häzirki ösüşleri bilen bir hatarda onuň sanlylaşdyrylmagy, halkara hyzmatdaşlygynyň işjeň ösdürilmegi hem döwletiň geljekki ösüş ugruny kesgitleýär.
2025-nji ýylyň 21-nji noýabrynda hem Türkmenistanyň Inžener-tehniki we ulag kommunikasiýalary institutynda “Halkara ulag-logistiki hyzmatdaşlygy berkitmekde Türkmenistanyň durnukly ulag syýasatynyň orny” atly sanly ulgam arkaly halkara ylmy-amaly maslahaty ýokary guramaçylykly ýagdaýda geçirildi. Bu halkara ylmy-amaly maslahatyna daşary ýurtlaryň bilim we ylmy edaralarynyň, halkara guramalarynyň wekilleri, ýurdumyzyň ýokary we orta hünär okuw mekdepleriniň professor-mugallymlary, edara kärhanalaryň hünärmenleri hem-de talyp ýaşlar işjeň gatnaşdylar.
Maslahatyň dowamynda sebitde parahatçylygyň we howpsuzlygyň üpjün edilmegi, hyzmatdaş ýurtlaryň ulag düzümleriniň wekilleriniň arasynda duşuşyklaryň ýygy-ýygydan geçirilmegi gatnaşyklary pugtalandyrmaga möhüm şertleri döredýändigini belläp geçdiler.
Türkmenistanyň häzirki wagtda güýçli depginde ösýän ulag ulgamy ykdysadyýetiň ähli pudaklary bilen göniden-göni baglanyşyklydyr. Ol ykdysadyýetiň hereketlendirijisidir.
Maslahata gatnaşyjylar öz çykyşlarynda ýurdumyzda Garaşsyzlyk ýyllarda demir ýol, howa we deňiz-derýa ulaglarynyň bitewi kuwwatly ulgamynyň döredilendigini belläp geçdiler.
Geljekde täze halkara ulag geçelgeleriniň döredilmegi, sanlylaşdyrylan multimodal daşama ulgamynyň doly ornaşdyrylmagy, ekologik taýdan arassa ulaglaryň paýynyň artmagy ýurdumyzyň ulag ulgamynyň ösüşiniň täze derejelerine çykmagyna giň şertler döreder.
Halkara parahatçylyk we ynanyşmak ýylynda türkmen halkyny ösüşleriň täze belentliklerine alyp barýan Türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun, beýik işleri elmydama rowaçlyklara beslensin!
B.Kulyýewa, Institutyň Ilkinji Zenanlar guramasynyň başlygy
