Bedenterbiýäni we sporty ösdürmek, sagdyn durmuş ýörelgeleri Türkmenistanyň döwlet syýasatynyň ileri tutulýan ugurlarynyň biri hökmünde çykyş edýär. Köpçülikleýin bedenterbiýe we sport hereketiniň ýaýbaňlandyrylmagy, adamlaryň ruhy we beden saglygynyň sazlaşykly ösdürilmegi milletiň sagdynlygyna oňyn täsirini ýetirýär.
Türkmenistanyň Inžener-tehniki we ulag kommunikasiýalary institutynda bedenterbiýe we sport çäreleri yzygiderli geçirilip durulýar. Ýakynda institutymyzda “Sagdyn nesil – Berkarar Watan” atly sport çäresi geçirildi. Sport baýramçylygyna öwrülen bu çäräniň dowamynda sportuň dürli görnüşleri boýunça bäsleşikler geçirildi. Hususan-da, sportuň futbol, woleýbol, basketbol, stolda oýnalýan tennis görnüşleri boýunça geçirilen bäsleşikler ýaşlarda uly täsir galdyrdy. Şeýle-de, sportuň oýun görnüşleri bolan küşt, düzzüm, şaşka boýunça geçirilen bäsleşiklere ýaşlar işjeň gatnaşdylar we ýeňijiler baýraklar bilen sylaglanyldy.
Türkmenistanyň Inžener-tehniki we ulag kommunikasiýalary institutynda ýaşlaryň berk bedenli we sagdyn ruhly bolmaklary üçin ähli şertler bar. Institutymyzyň Sport toplumynda ýaşlaryň beden maşklaryny ýerine ýetirmekleri üçin niýetlenen ýörite türgenleşik otagynyň bolmagy we talyplaryň bu ýere yzygiderli gelmegi olaryň sporta höwesiniň uludygyny alamatlandyrýar. Talyplaryň bedenterbiýe maşklaryny talabalaýyk ýerine ýetirmeklerine ýokary hünärli tälimçi-mugallymlar gözegçilik edýärler we gerekli maslahatlary berýärler.
Institutymyzda geçirilen sport çäresiniň dowamynda talyp ýaşlarymyzdan düzülen aýdym-saz topary hem çykyş edip, dabaranyň şowhunyny has-da artdyrdyr.
Sport çäresine gatnaşyjylar, bedenterbiýe we sport hereketiniň giňden ýaýbaňlanmagy, halkymyzyň ruhubelent, bagtyýar durmuşy üçin taýsyz tagallalar edýän Mähriban Arkadagymyza çäksiz sagbolsun aýtdylar we Milli Liderimiziň janynyň sag, ömrüniň uzak, işleriniň rowaç bolmagy arzuw etdiler.
Gülşirin Agaýewa,
Türkmenistanyň Inžener-tehniki we ulag
kommunikasiýalary institutynyň
“Çyzuwly geometriýa we inženerçilik grafikasy”
kafedrasynyň mugallymy