Berkarar döwletiň täze eýýamynyň Galkynyşy döwründe kalbymyza şatlyk nuruny çaýyp, her bir döwletli ojaga egsilmez bagt getiren, rysgal-bereketli Täze ýylyň şatlygy ajaýyp dünýämizi gurşap aldy. Garaşsyz, hemişelik Bitarap Diýarymyzyň çar künjeginde, uly şatlyk bilen garşy alynýan Täze ýylyň ata Watanymyzy, bagtyýar halkymyzy täze başlangyçlara, täze sepgitlere, beýik ýeňişlere beslejekdigi baradaky aýdyň hakykat göwünlerimizi galkyndyryp, ýüreklerimizi joşa getirýär.
“Pähim-paýhas ummany Magtymguly Pyragy” ýyly Garaşsyz, Bitarap Watanymyzyň taryhynda, zähmetsöýer halkymyzyň durmuşynda şöhratly ýyllaryň biri boldy. Bu ýylyň möhüm wakalary Berkarar döwletimiziň halkara abraýynyň barha artýandygynyň, alyp barýan daşary syýasatynyň dünýä bileleşigi tarapyndan uly goldaw tapýandygynyň aýdyň subutnamasyna öwrüldi. Uly ösüşlere beslenen 2024-nji ýylymyzda Mukaddes Garaşsyzlygymyzyň şanly 33 ýyllyk toýyny mähriban halkymyz uly dabara bilen belläp geçdi. Ak mermere beslenen paýtagt şäherimiz Aşgabatda halkara derejesinde maslahatlar, duşuşyklar yzygiderli geçirildi. Bu ýylda dana şahyrymyz Magtymguly Pyragynyň döredijiligini, milli mirasymyzy dünýä ýüzüne ýaýmak ugrunda giň möçberli işler durmuşa geçirildi. Diýarymyzyň ähli bilim ojaklarynda milli medeniýetimizi, sungatymyzy, döredijiligimizi hem-de senetlerimizi ýaşlara düşündirmek we wagyz etmek işleri hem uly gerime eýe boldy. Hormatly Gahryman Prezidentimiziň tagallalary netijesinde ata Watanymyz tanalmaz derejede ösdi we özgerdi.
Ýetip gelen 2025-nji “Halkara parahatçylyk we ynanyşmak” ýylynda hem Arkadagly Gahryman Serdarymyzyň parasatly syýasatynyň netijesinde Garaşsyz ýurdumyzda amala aşyrylýan beýik işlere, şöhratly özgertmelere, eziz Diýarymyzyň her gününi bezeýän ajaýyp wakalara halkymyz tüýs ýürekden guwanýar hem-de buýsanýar. Bu şanly ýylda hem ýurdumyzyň döwletlilik binýadynyň berkemegi, ykdysady kuwwatynyň has-da artmagy, halkymyzyň ýaşaýyş-durmuş derejesiniň ýokarlanmagy babatda geljegi uly meýilnamalar amala aşyrylar.
Türkmenistanyň Inžener-tehniki we ulag kommunikasiýalary instituty hem-de “Arkadag” teleýaýlymy bilen bilelikde gurnamagynda “Halkara parahatçylyk we ynanyşmak” ýyly mynasybetli Döwletmämmet Azady adyndaky Arkadag şäher kitaphanasynda “RUHY GYMMATLYKLARYMYZ ÝAŞLARYMYZYŇ BUÝSANJY” atly döredijilik duşuşygy geçirildi.
Türkmenistanyň Inžener-tehniki we ulag kommunikasiýalary institutynyň halypa mugallymlarynyň, talyp ýaşlarynyň hem-de kitaphana işgärleriniň gatnaşmaklarynda geçirilen bu duşuşykda Arkadagly Gahryman Serdarymyzyň ýolbaşçylygynda alnyp barylýan oňyn Bitaraplyk syýasaty, häzirki döwürde şöhratly taryhymyzda yz galdyran beýik şahsyýetlerimiziň döredijiligine goýulýan hormat-sarpa hem-de gurluşygy dowam etdirilýän döwrebap Arkadag şäheriniň binagärlik keşbinde Watanymyzyň durmuş-ykdysady taýdan okgunly ösüşi, ýaşaýyş-durmuş üpjünçiliginiň guralyşynda milli mirasymyzyň, ruhy gymmatlyklarymyzyň, halkymyzyň köpasyrlyk baý taryhy we medeni däpleriniň öz beýanyny tapýandygy barasynda söhbet edildi.
Duşuşykda Arkadagly Gahryman Serdarymyzyň baştutanlygynda ýetip gelen täze – 2025-nji “Halkara parahatçylyk we ynanyşmak” ýyly ata Watanymyz üçin ösüşleriň, zähmetsöýer halkymyz üçin täze ýeňişleriň we üstünlikleriň ýyly boljakdygy nygtalyp, Watanymyzyň halkara abraýy, halkymyzyň agzybirliginiň we jebisliginiň müdimi binýady bolan Garaşsyz, baky Bitarap Türkmenistan ýurdumyzyň beýik ýeňişleri barada çykyşlar boldy.
Bu geçirilen dabaraly çäre, Arkadagly Gahryman Serdarymyzyň durmuşa geçirýän parasatly syýasatynyň halkymyzyň bagtyýar ýaşamagy hakyndaky aladasynyň many-mazmuny bilen utgaşyp, şeýle döwletli tutumlaryň başynda duran türkmen halkynyň Milli Lideri Gahryman Arkadagymyzyň hem-de Arkadagly Gahryman Serdarymyzyň janlarynyň sag, ömürleriniň uzak, işleriniň rowaç bolmagy arzuw edildi.
Gülşirin Agaýewa, “Çyzuwly geometriýa we inženerçilik grafikasy” kafedrasynyň mugallymy.